Historia di UCU

Nos historia ta originá 12 novèmber 1965 despues di trabou, ora 25 empleado di OGEM den Quarantaine gebouw na Mundu Nobo a reuní paso OGEM  kier a para e dunamentu di voorschot kontinuo. Pa nesesidat aki, nan a kuminsá ku nan kooperativa, kaminda tur huntu por a spar sinku heldu  i asina a logra un suma chikitu ku nan obligashon i nesesidatnan. E direktor di e tempu ei a disidí di sostené e empleado nan aki finansieramente. For di kantor di OGEM den un edifisio situá na Molenplein algun atministradó a sa di operá un kooperativa, ku despues di a prueba su mes a haña un inyekshon di OGEM pa asina tin mas kapital pa por atendé ku e kantidat di sosio ku tabata kresiendo.

 

Bou di e nòmber “Coöperatieve en Spaarvereniging OGEM GA”  por a yuda e sosio ku a uni forsa pa ta solidario den un kousa komun. E sosiedat aki a bin presentá loke nan a yama e prinsipionan di kooperativa, ku a garantia pa buena marcha di e empresa finansiero sosial aki. Den promé tempunan e  sosio no tabata haña ningun tipo di splikashon, pero pronto a bin ripara ku kooperativa ta eksigí un otro manera di pensa i ku importante ta e hende i kiko hende ta hasi ku pertenensia di otro hende.

Despues di bintisinku (25) aña a start un era nobo den nos kooperativa ora ku a bini un direktiva nobo ku a bin presentá loke nan ta yama e prinsipionan di kooperativa, ku ta un garantia pa buena marcha di e empresa sosial aki.

Nan a mustra ku no ta konosementu di atministrashon, ni di finansa mester, ma hende responsabel ku sentido sosial, interesá pa yuda su próhimo i haña yudansa ora nan mes tin mester.

 

Na 1994 Coöperatieve en Spaarvereniging OGEM GA”  a hasi su entrada na Bonaire. Un kuater èks empleado di Ogem a mustra otro kolega e benefisio ku nan tin siendo sosio di “Coöperatieve spaar- en creditvereniging Ogem G.A.”.

Despues ku na 2002 kooperativa Ogem a kambia su statuto i bira “spaar- en kredietvereniging utiliteitsbedrijven”, tambe yama “Utility Credit Union”. UCU a sa di fungi ku kompanianan ku ta asosiá ku nos kooperativa. Asina nos a asosiá ku diferente otro kompania na Curaçao i Bonaire ku poko poko a hasi nos asosiashon interinsular. UCU ku semper a resaltá komo un kooperativa  ku ta focus pa su servisio personal na su sosio a haña invitashon di e grupo di interesado pa nan por bira sosio di nos kooperativa.

A logra trese nos kooperativa na nivel, ku un statuto nobo i un nòmber nobo ku nos tur ta orguyoso di dje. “Utility Credit Union” sigur sigur ta un ehèmpel pa otro credit union i tras di tur organisashon tin hende ku ta karg’é i ta determiná pa kuida kara, nòmber i akseptashon.

 

Ora ku na 2009 a bini un direktiva nobo ku a presentá un plan di operashon ku e mensahe ku den kooperativa no ta un hende so por manda i disidí, no ta negoshi di un persona, ma un sistema ekonómiko finansiero di un grupo di hende ku ta pasa den mes problemanan òf kier avansá mas den bida. Ora ku gerensia di Aqualectra a a partisipá UCU ku mester bandoná e lokalidat ku nan ta okupá riba tereno di Aqualectra. Direktiva di UCU a hañ’é dilanti un reto nobo i a kuminsá move shelu i tera pa finalmente na yüli 2009 a logra haña un  espasio adekuá na Roodeweg 120. A hasi diferente invershon no presupuestá pa logra pone e edifisio den un estado pa por funshoná komo kantor, pa no mas ku novèmber despues di evaluá diferente lokalidat direktiva a kumpra e edifisio, na Weg naar Welgelegen 18.

 

Pa por kumpli ku e demanda di servisio ku nos sosio na Bonaire ta meresé, UCU a habri den yüli 2010, un kantor den Kaya Grandi #53 unit A. Operando di dos ’or pa seis ‘or den komunikashon estrecho ku nos ofisina na Kòrsou UCU ta brinda e sosio di Bonaire e atenshon ku nan meresé. Den e forma proaktivo  nos ta habri un porta virtual pa asina nos por atendé ku nesesidat di tur sosio na Bonaire.

 

Riba e tereno di outomatisashon tampoko “Utility Credit Union” a para ketu. Ku un sistema di atministrashon nobo i tambe nos ta hasiendo uso di Internèt ku website www.ucucuracao.com i riba Facebook pa mantené e sosionan na altura di akshonnan di nan organisashon. Asina “Utility Credit Union” ta purba di tin mas komunikashon entre e sosio di kooperativa.